وانت بتشتري لاب توب هتلاحظ ان الاجهزة نوعين من حيث كارت الشاشة الموجود :
الاولاني ده دايما إنتل(intel) لما البروسيسور – المعالج الرئيسي– بيبقى إنتل(intel) ودا يا سيدي بقى الكارت المدمج مع البروسيسور – المعالج الرئيسي– او بمسمى اخر انتجريتيد(Integrated)، ازيدك من الشعر بيت … ملوش رامات منفصله! ده بيستخدم رامات الجهاز– بيحجز جزء منها لنفسه ع شان يشتغل يعني ملوش ذاكرة منفصله.
طيب ومين كمان؟
اي ام دي(AMD) كمان بتعمل كده. لما البروسيسور – المعالج الرئيسي– بيبقى اي ام دي(AMD) وفي الغالب الموديلات الاكتر انتشارا من كروت الشاشة هي راديون (Radeon).
الاجهزة اللي كارت الاشاشة فيها مدمج موجهة لاصحاب الاعمال اللي شغلهم مش مطلوب فيه كارت شاشة يعني اعمال مكتبية، محاسبية، العاب خفيفة، شوية افلام وباوربوينت … الخ
في المقابل سعر معقول مقبول جدا وموفر للطاقة بشكل كبير ودا بينعكس علي عدد ساعات تشغيل الجهاز بشحنة بطارية واحدة.
اما النوع التاني من الاجهزة بيبقى فيه كارتين شاشة! ايوا زي ما بقولك كده كارتين شاشة
واحد مدمج – انتجريتيد (Integrated) – زي ما قلت لك ع شان البروسيسور – المعالج الرئيسي.
والتاني منفصل ديديكاتيد (Dedicated) ودا بقي له ذاكره منفصله (VRAM) من ١جيجا الى ٨جيجا تقريبا يعني ملوش دعوة برامات الجهاز نهائيا مثال سريع كده:
ممكن تلاقي لاب توب البروسيسور بتاعه إنتل (intel) يعني فيه كارت مدمج من إنتل وفيه كارت تاني
من نفيديا (nVidia) او (Radeon) مثلا ودا في اجهزة الاب توب بس.الامر مختلف شويه في ال PCالاجهزة المكتبية.
نرجع بقي لموضوعنا الاجهزة اللي فيها كارتين شاشة موجهة لاصحاب الاعمال الشاقه اللي محتاجه
كارت شاشة منفصل زي برامج الجرافيك والمونتاج والالعاب الكبيرة وبالتالي بيبقى سعر الاجهزة دي اغلى شويه من النوع الاولاني. واستهلاك الطاقة اكيد اكبر ع شان كارت الشاشة الخارجي و مقدرش انسى الحرارة الناتجه من كارت الشاشة الخارجي بتيقى اكبر.
طيب معلومه كمان ع الماشي… نظام التشغيل هوه اللي بعمل ادارة لموضوع من من الكارتين اللي يشتغل دلوقتي يعني الكارت المدمج هوه دايما اللي شغال علي طول لحد ما تشغل برنامج او لعبة كبيره النظام تلقائيا بيشغل الكارت التاني علي طول وممكن كمان المستخدم يحدد القواعد دي عن طريق برنامج التحكم في الكارت المنفصل.
