تعالى اقولك علي فرق الوان الهاردات ال ويسترن ديجيتال
Western Digital
طيب مبدئيا كده ويسترن ديجيتال دي من اشهر الشركات المنتجة لوسائط التخزين اللي منها الهاردات اللي تهمنا
اول لون يا معلم هوه اللون الاخضر او اللي بقى ازرق دلوقتي!
الموديل ده صديق للبيئة يعني استهلاكه للطاقه قليل جدا بالمقارنه مع الموديلات التانيه – الالوان التانية– سرعة ال ار بي ام (RPM) ما بين ٥٤٠٠ الى ٥٩٠٠ بس ، وتقريبا قليل جدا اذا لقيته دلوقتي
لان بديله هو اللون الازرق ع شان كده مش هنرغي فيه كتير ونقلب علي اللي بعده
تاني لون الازرق
الموديل دا الاكثر انتشارا بين كل الالوان لانه مناسب لجميع الاستخدامات وسعره في متناول الجميع
موجود في السوق من اول ٥٠٠ جيحا الي ٦ تيرا من سعة التخزين اما سرعة ال ار بي ام (RPM) من اول ٥٤٠٠ الى ٧٢٠٠ وذاكرة الكاش ٢٥٦،٦٤،٣٢ ميجا كمان، ملاحظة بسيطة تخص اللون الازرق ده بس ان في موديلات منه (SSHD) يعني الموديل ده عبارة عن دمج لل اس اس دي وكمان ال اتش دي دي مع بعض يعني اسرع شوية من العادي، وهنتكلم عن الموضوع ده بعدين.
تالت لون هو الاسود
الموديل دا طبعا معروف في السوق بالسرعة والامكانيات العالية وكمان السعر الاغلى،بس استهلاكه للطاقة كبير نسبيا، متوفر في السوق من اول ٥٠٠ جيجا الى ١٠ تيرا من التخزين اما سرعة ال ار بي ام ٧٢٠٠ بس، الاختلاف هنا في سعة ذاكرة الكاش فهي ٢٥٦،٦٤ ميجا.
رابع لون الاحمر
الموديل دا متخصص شويه عن الالوان اللي فاتت ع شان الموديل ده معمول ومخصص ع يشتغل في سيرفرات – خوادم ـ التخزين الشبكي اللي اسمها ناس او سان ولان دي مهمته الرئيسية فهوه بيقدر يشتغل بشكل متواصل بلا انقطاع واستهلاكه بسيط جدا من الطاقة وضمانه
من الشركه المصنعه بيبقى ٥ سنين،وطبعا موجود في السوق من اول ٢ تيرا الى ٦ تيرا من سعة التخزين، اما سرعة ال ار بي ام ٥٤٠٠ بس، الاختلاف هنا في سعة ذاكرة الكاش فهي٢٥٦ ميجا.
نفس اللون الاحمر بس المره دي موديل ال برو منه
الفرق هنا في السعة التخزينية من اول ٢ تيرا الى ١٨ تيرا ، وكمان اسرع من الاحمر العادي يعني
سرعة ال ار بي ام ٧٢٠٠ وذاكرة الكاش ٥١٢،٢٥٦،٦٤ ميجا.
يعني الخلاصة الموديل ده هوه هوه الاحمر لاكن اسرع وبسعات اكبر للتخزين مش بقولك بتاع سيرفرات تخزين
خامس لون البنفسجي
الموديل دا معروف جدا للناس اللي شغاله في تركيب انظمة المراقبة والانظمه الامنية، ليه بقى؟
فاكر لما قلت لك ان اللون الاحمر متخصص للتخزين في خوادم التخزين!
دا بقى مخصص للعمل في التسجيل المستمر لفترات طويله جدا، استهلاك طاقة قليل جدا وحرارة بسيطه لانه ببساطه مش مطلوب منه السرعه علي حساب الاستقرار في العمل. يعني متجيش تجمع جهاز وتجيب هارد لونه بنفسجي وتقولي ع شان الاستقرار لان كده هتخسر جزء كبير من السرعة اللي انت محتاجها في التشغيل مثلا ( بلاش تجود من عندك ).
متوفر في السوق من اول ١ تيرا الى ١٨ تيرا، اما سرعة ال ار بي ام ٧٢٠٠
وذاكرة الكاش ٦٤ ميجا لجميع الموديلات ماعدا ال ١٨ تيرا بيجي ب ٢٥٦ ميجا كاش
خلى بالك الموديل دا اخره يسجل من ٣٢ كاميرا للمراقبة بس.
اما اذا كنت محتاج تسجل من عدد كامرات اكتر فانصحك تجيب نفس اللون البنفسجي لاكن موديل ان في هوه هوه نفس البنفسجي مع اختلاف انه سعتين بس ٤ تيرا او ٦تيرا بنفس سرعة ال ار بي ام وذاكرة الكاش هي هي. لاكن له القدرة علي التسجيل لاكتر من ٣٢ كاميرا.
